POLOKALAME MO PEMITA NOFOMAU MO LE 2004-2005
MATAGALUEGA A LE PALEMIA MA LE KAPENETA, APIA, 30 IUNI 2004
Ua faalauiloa mai i le aso e le Afioga i le Alii Palemia, Susuga Tuilaepa Sailele Malielegaoi, le faamaonia e le Kapeneta o avanoa e sefulu (10) mo le polokalame mo permita nofomau mo le tausaga faapolokalame 2004-2005.
O le tausaga muamua lenei ua faatuina ai e le Malo o Samoa se polokalame mo pemita nofomau ma o se tasi o faiga fou i totonu o le Tulafono mo Femalagaaiga 2004.
I le faalauiloaina o lenei polokalame, na faaalia e le Alii Palemia, o lenei faaiuga o le tali atu i le vaega o le Tulafono o Femalagaaiga 2004 o loo manaomia ai le iloiloina e le Kapeneta le aofai o pemita e mafai ona faamatuuina atu i le tausaga.
E manaomia foi ona iloiloina e le Kapeneta i tausaga taitasi manaoga mo le agavaa ai e tuuina atu ai se pemita nofomau. Ma ua maea ona faia lea iloiloga.
O lenei polokalame o loo aofia ai ma pemita e lua (2) mo Talosaga mai fafo atu o Samoa ma ua i ai le faamoemoe o nei pemita e Lagolago ai le mau a le Malo mo le faatosina mai o pisinisi mai fafo i totonu o Samoa.
O le a faaaogaina e le Malo ia Ofisa o Fefaatauaiga a Samoa o loo i atunuu i fafo latou te faailoa mai ni pisinisi fou e fia faatuina i totonu o le atunuu.
I le tulaga i le agavaa, na faaalia e le Alii Palemia, ua faataatia nei e le Kapeneta i se tulaga maualuga, aiaiga mo lea itu, ina ia mautinoa ai o i latou e Talosaga mai, o le a tele se latou sao i le atiina ae o le atunuu.