Tupe Faaalu mo le Fono a Taitai o Malo o le Pasefika, Apia, Samoa, aso 3-10 Aokuso 2004
Ua faamaonia e le Kapeneta le vaegatupe e $730,000 mo tapenaga a le Malo i lana taligamalo mo le Fono a Taitai o Malo o le Pasefika e faia i Apia, mai le aso 03-10 o Aokuso 2004.
E sefulu ma le ono (16) atunuu o le Pasefika o sui auai ia ole Forum e aofia ai Ausetalia ma Niu Sila, faatasi ai ma sui faalogologo e toalua. O le aofai o le au usufono o le a malaga mai i Samoa o loo fuafuaina le 200 i le 250.
O le fono a le Komiti o Ofisa Sinia o le Forum o le a usuia i le aso 03-04 o Aokuso. O le fono a Taitai o le Forum o le a usuia i le aso 05-07 o Aokuso. E sosoo lea ma le fono a Atunuu o le Forum ma atunuu latou te fai paaga i le aso 09-11 o Aokuso.
O tulaga masani o tapenaga mo le Forum i tausaga taitasi, e saunia ma totogiina e le atunuu e talimalo ia faletalimalo, taumafa, taavale, potu fono, tatalaga aloaia, faiga faaaloalo masani, le puipuiga atoa ma meaalofa.