MALELEGA A LE AFIOGA MAMALU I LE AO O LE MALO, SUSUGA MALIETOA TANUMAFILI II, FAAMANATUINA O LE 42 TAUSAGA O LE TUTOATASI O LE MALO SAMOA
Malae o Tiafau, Mulinuu, aso 1 Iuni 2004
Lau Susuga i le Ta’ita’i o le Sauniga, Afioga Akiepikopo Alapati Mataeliga,
Afioga i le Sui o le Fono a Sui Tofia ma le Faletua,
Afioga i le Alii Palemia ma Minisita o le Kapeneta ma o outou Faletua,
Afioga i le Faamasino Sili ma le Ofisa o Faamasinoga,
Afioga i le Fofoga Fetalai ma Sui Usufono o le Palemene o Samoa,
Afioga i le Kovana Sili o Amerika Samoa ma le Faletua,
Sui o Malo ma Faalapotopotoga mai Fafo,
Aiga ma Tama, o Tama foi ma Aiga,
Le Usoga a Tumua ma Pule,
Le Mamalu o le au Valaaulia.
Ou te faatalofa atu i le paia ma le mamalu ua aofaga potopoto i Tiafau nei i lenei taeao. Ou te faatalofa atu foi i le mamalu ma le paia o Samoa o lo’o maimoa ma faafogafoga tapuai mai i afioaga ma alalafaga o lo tatou atunuu.
O lo’o tatou faailoga pea i tausaga taitasi, lenei aso fiafia mo Samoa atoa, tatou te faamanatuina ai lo tatou tutoatasi. O lenei tausaga ua atoa i ai le 42 tausaga talu ona sisiina a’e le fu’a o le saolotoga i Mulinuu nei. Tatou te faafetai ai pea le agalelei o le Atua i lo tatou atunuu, a’o maua pea e i tatou uma le manuia ma le soifua lelei, e ui ina sa feagai lo tatou atunuu ma afa i le amataga o lenei tausaga, ae e le o tuulafoaina i tatou e lo tatou Matai Sili i le lagi.
Tatou te tau fai lagona ai pea ma le loto faafetai i aso faapenei, tuaa ma matua ua fai-i-lagi le folauga, o e sa tofu sao i le atinae o lo tatou atunuu. O a latou galuega mo le manuia o Samoa ma ona tagata e manatua pea lava.
E faafetai atu i lau Afioga i le Kovana Sili ma le Aumalaga i lo outou faatasi mai i lenei tausaga mo le faamoemoe o Samoa. E momoli atu foi le faafetai i a tatou paaga mai Malo ma Faalapotopotoga mai fafo ua mafai ona tatou faatasi i lenei taeao. Faafetai mo lo outou sao taua mo le atinae o Samoa i ana taumafaiga e faalelei atili ai lona tamaoaiga.
Ou te faamalo atu foi i pulega lelei faale-aganuu i nuu ma itumalo taitasi, e amata mai ta’ita’i e o’o atu lava i autalavou ma tupulaga o teine ma tama e pei ona auai mai i lenei taeao. Faafetai i lo outou galulue punouai e lagolago fuafuaga faataatitia mo le manuia auiluma o lo tatou atunuu.
Tupulaga talavou e o Samoa i tamaitai ma alii, o outou o le faamoemoe o le atunuu mo a taeao. Ia outou tutumau i le soifua faa-Kerisiano e ogatasi ma tu ma aganuu a Samoa, e pei ona faata’imua mai e lo tatou Faavae.
Ia faamanuia mai le Atua ia Samoa ma o tatou malo ua tatou faatasi ai i Tiafau nei. Ia faapea foi ona manuia le mamalu lasilasi o lo’o tapuai mai i afioaga ma alalafaga. Ia uli ma sao le faamoemoe o lo tatou atunuu i le agalelei mai o lo tatou Matai Sili i le lagi.
Soifua.